الاثنين، 28 سبتمبر 2009

حيرتينى

العطله الأسبوعيه حلت وطبعا موعد طلعة الزوجه والأولاد للغداء فى أحد المطاعم "ليش بس غدا مافى فى الجدول شى قبل أو بعد " الظاهر اللى يسأل مو عايش معنا !!
المهم طوفو
ياحبيبتى ياعمرى أنت وين تبين تروحى ....أى مطعم ,إختارى المكان وأنا حاضر
ترد عليك... أنت ودينا المهم إنا طلعنا من البيت وبس
حلو كلام جميل مع أنى ما إقتنعت ...شو هالرضا والقناعه اللى هبطت عليها ...الله يستر
أرد عليهاتأكيدا خوفا من أن أكون قد سمعت غلط أو كان الارسال فيه تشويش ....أى شى أنا أختاره يعنى المطعم اللى أنا أختاره ..متأكده حبيبتى ياروحى أنت
ترد وتقول ...اللى بدك إياه
الأن تأكدت تماما أنى فهمت صح , حلو وجميل الله هاديها اليوم
شرايكم , لاحظو أخذت الراى والمشوره أولا ..شرايكم نروح الشيراتون
ترد ...لا الناس هناك دمها ثقيل واليهال يفشلونا من حنتهم شوفلنا مكان ثانى
شرايكم نروح الافنيوز ....ترد لا زحمه وماكو مواقف ومصبنه وبنات فاصخين
شرايكم الهوليداى..لا شرايكم المارينا ....لا الكوت لا
ماكدونالد ... يعنى مطلعنا تودينا ماكدونالد ...
شرايكم ..مغل محل ...شنو أحنا هنود
شرايكم ..شرايكم ...شرايكم والرد دائما إما لا أو أى عذر معناه لا
زين حبيبتى أنت بس قولى وين تبين وأعتبرى إجابتى نعم حاضر من الحين بس أنت إختارى ...ترد عليك لا أنت إختار كيفك
طبعا أنا عاهدت نفسى من الصبح أنو ما أزعل ولا أعصب وأكتم غضبى بكل الطرق المناسبه بس ما أخفيكم إنى بلشت أعصب من داخلى
من جديد ...حبيبتى أنا إقترحت عشرين مطعم وأنت ما رضيت ,لذلك أطلب منك تقترحى مطعم واحد فقط وأنا موافق عليه مسبقا ....
ترد وتقول ...ماأدرى أنت اللى تعرف فى المطاعم مو أنا "سبحان الله صارت الحين ماتعرف شى "
ماراح أقولكم شنو صار بعدين لانكم كلكم عارفين .....صح

هناك 3 تعليقات:

  1. الحريم حريم
    مع إختلاف البلدان
    والجغرافيات
    والأماكن
    والأزمنة

    ردحذف
  2. نون النساء
    ماأعرف أقولك كلامك صحيح ولا لا
    تعتقدى كل الناس تعانى من نفس المشكله؟

    ردحذف
  3. فقط عندما تُصاب بحالة الـــ( مادري .. كيفك أنت )

    ردحذف